Jamita Minggu XXIII dung Trinitatis, 11 November 2012

Evanggelium ; Heber 9 : 24 – 28
Epistel ; Psalm 146 : 1 - 10

Thema : Panobusion ni Kristus Sahali ro disalelengnilelengna

I. Patujolo
Surat Heber disurathon tu angka Kristen Jahudi na di pangarantoan, laho patoguhon haporseaonnasida. Boasa porlu patoguhon ? Ala tubu ganggu ni roha di angka na porsea uju i taringot tu bagabaga ni Debata dohot tu haluaon dibagasan Kristus. Marhite surat on, diondolhon do taringot tu hasasaut ni bagabaga haluaon ni Debata di bagasan Kristus di angka na porsea. Jala Kristus i do na gabe hasisingkop ni hapapatar ni Debata tu portibi on. Kristus i do Sintua ni Malim na Bolon i naung mamelehon hosaNa sandiri gabe tobus ni dosa ni portibi on tu Debata marhite silang na sahat tu Ibana. Jala marlangku do i sahali ro di saleleng ni lelengna sahat tu na ro Ibana muse paduahalihon. Asa botoon ni angka sipanjaha surat Heber on, ai dibagasan Kristus do dalan manopot inganan naung pinaradeNa di angka na porsea di Ibana. Laos i do nang na diondolhon di turpukta on, asa lam bagas pangantusion laho patoguhon haporseaon tu Debata di bagasan Kristus.

II. Hatorangan
Adong 3 pangondolan ni turpuk on tu hita. Dia ma i ? 1. Tuhan Jesus Kristus do parhiteanta tu Debata. Di ay. 24 didok :”Ai ndada bongot Kristus tu bagasan na badia na pinauli ni tangan, gombaran ni na sintong i; tung tu bagasan banua ginjang sandiri do, laho patuduhon diriNa nuaeng di adopan ni Debata humonghop hita”. Kristus i do Debata na gabe jolma, na so dung mardosa songon jolma somal, marharoroan sian surgo, jala ndada tu bagasan na badia na pinauli ni tangan (Bagasa Joro na parjolo i) Kristus i laho, alai tu surgo do mangadop tu Ama i laho paradehon inganan di angka na porsea di Ibana. PangadopanNa tu Ama i, ndada holan tu hasangaponNa sandiri alai dohot do mambuha dalan di angka na porsea asa parsidohot mangadop tu Ama i. Singkop do ngolu nang panghobasionNa saleleng di portibi on. Umbahen na talup Ibana gabe parhitean laho padomuhon jolma na mardosa tu Debata na badia. Ndang adong parhiteanta asing ni Kristus i. Di Johannes 14 : 6 didok Tuhan Jesus do :” ... Ahu do dalan i dohot hasintongan dohot hangoluan. Ndang adong na sahat tu Ama i, ia so marhite sian Ahu”. Astuanna; Molo naeng sahat tu Ama i, ro ma tu Tuhan Jesus. Molo naeng mangantusi/mangalului hasintongan, ro ma tu Tuhan Jesus. Jala molo naeng dapotan hangoluan ro ma tu Tuhan Jesus. Molo adong halak na manghatindanghon hadirionna gabe dalan tu Ama i manang parhitean tu surgo, hata gabus do i. Sai unang tartait hita manghaporseai panindangonna i manang mangihuthon podana. Ai tardok do i, parpoda haliluon. 2. Panobusion ni Kristus do na singkop. Mangihuthon 3 Musa 16 : 15 – 22 ingkon patupaon ni halak Israel do marhite malim pelean pardamean/pardengganan ala ni dosa ni bangso nang malim i tu Debata. Alai, ndang singkop pelean na hinobasan ni malim i (ay.25). Mulahulak do dipatupa asa mardame jolma i dohot Debata. Ganup taon, ingkon ro do jolma i mamboan pelean pardamean tu Debata. Boasa ? Ala jolma i do na mardosa dompak Debata. Targade jolma i tu dosa, umbahen na porlu panobusion. Alai ise ma na tuk manobus, ai rap mardosa do sude. Ingkon mudar ni jolma na so siula dosa do na tuk manobus singkat ni jolma naung targade tu dosa. Tuhan Jesus Kristus do halakna. Ndang adong na asing. Kristus i do Birubiru ni Debata na mamorsan dosa ni portibi on (Joh. 1 : 29), na gabe pangondianta dohot pardenggananta (I Joh.2 : 1 – 2; Rom 3 : 24 – 26). Holan mudar ni Sintua ni Malim na Bolon i do na tuk pasingkophon pelean pardamean i. Ndang mulahulak be patupaon pelean pardamean, alai sahali do i jala marlangku ro di salelenglelengna (ay.26). 3. Holan sahali do masa hamamate ni Kristus singkatta manaon uhum ni dosa. Ampe tu Ibana uhum na laho tu hita hian. Hita do na mardosa, alai Ibana do manaon uhumanta. Didok do :”Songon na ampe tu jolma: mate sahali, dung i diuhum, songon i do nang Kristus, naung sahali dipasahat laho mamorsan dosa ni natorop i; alai paduahalihon ndada ala ni dosa, tarida ma Ibana disi, mantat haluaon di angka na paimahon Ibana (ay.27-28 ”. Holan sahali do i masa : Kristus mate ala mamorsan dosa ni jolma, alai jolma mate ala upa tinuhor ni dosa (Rom 6 : 23a). Di tingki na ro pe Kristus paduahalihon tu portibi on, ndada laho manjalo uhuman be, alai laho mandabu uhum nama tu angka na so porsea dohot mangalehon haluaon diangka na paimahon (porsea) di Ibana. Tung so i nama hinatabo ni na manghaporsea i Debata dibagasan Kristus. Ala ni i, nda patut ma hita satia di panghaporseaon tu Ibana. So tung unang ganggu ala ni na masa di portibi on, manang gabe maninggalhon haporseaonna hian asa tu haporseaon na asing (murtad). Nda songon i do na torop dibahen halak di partingkian nuaeng on ? Ala ni karejo, arta, parsahiton, baoa manang boruboru na uli, dohot angka paraturan na so mamihak tu halak Kristen i ,dna, maninggalhon Kristus. Boasa songon i? Ala ndang diantusi panghophopon ni Kristus di ibana. Mangarajumi dibagasan neang ni roha panobusion ni Kristus i di ibana. Autsugari arga panobusion i di ibana (angka na murtad i), ndang tundalhononna/tinggalhononna Kristus i, nang pe ditawarhon portibi on angka na uli ni portibi on. Sidalian na jotjot dihatahon ima :”Semua agama kan sama, hanya banyak jalan menuju Roma”. Sintong do godang dalan tu Roma. Alai tu Roma do i, ndada tu surgo. Hata sisongon i ndang marlangku laho tu surgo. Kristus i do dalan tu surgo. Asing ni ndang adong ! Tahajamothon ma dirinta ganup nang angka pomparanta i, so tung ditinggalhon Kristus i.

III. Panimpuli
1. Kristus i do pardenggananta dohot Debata, asa dung i gabe mardame ma hita (jolma parsdosa) dohot Debata na sun badia i.
2. Panobusion ni Kristus marlangku jala marhuaso sahali ro di salelenglelengna.
3. Tahaporseai ma Kristus i dibagasan ngolunta, ai ido lombulombunta (perisai) laho manaluhon sumbia ni sibolis i. Amen.



Pdt.Refi Lenni Marlina Lubis,S.Th
Pendeta diperbantukan GKPI Resort Pekanbaru